Sen. Nov 18th, 2019

Kodhok Gêmblung

Photo source : http://animals.howstuffworks.com/

Kodhok Gêmblung

Ana kodhok methok, linggihé andhodhok, ambêngkêrok mêlok, mêlok ora ndêlok.
Dhasar gêmblung tansah mêlung muni kang kung, sanadyan mung swara lagu theyot thèblung.
Patrap lungguh dhédhé, sacêdhaking traté, ngrasa dhéwé kaya, yèn priyayi gêdhé.
Ngambang banyu pisan, ora ngrasa lunyu, malah mrabu kaya, uwong nunggang tandhu.

ngGoné dhédhé nunggu, wêtuning srêngéngé, gagasané angêt , saiba pénaké.
Barêng padhang kétok , matané ambranang, padha abang kaya, ambrêbês dibrambang.
Mripat pat pêt kêrêp , kaya mêrêm dhipêt, kétok rapêt rada, mèmpêr gêni upêt.
Nuli nywara gandhang , kaya sundhul méga, kana-kana kabèh, padha krungu cêtha.

Swarané dilaras, kadiya mangkéné, wah énaké dhédhé, ing wayah mangkéné.
Yèn mathuké kudu, karo udud srutu, luput iku ya mung, tarima mêcucu.
Karo jegang nyawang, kana kéné padhang, nanging gêmang aku, yèn dikira dêmang.
ngGonku antêng pantês , aku duwé jênêng, mêsthi ngêngrêng pama, yèn disêbut kangjêng.

E ladalah kaé, jêbul ana simbah, sajak sayah nanging, ayah mêsthi ngarah.
Yèn marono sida, awakku dikéndho, coba dakundangé , nganggo simbah bango.
E, kiyai ndika, ampun nyedhak mriki, kula niki maring, ndika rada wêdi.
Bango clathu sajak, antêng lan angguyu, o, yèn aku klêbu, bango sing wis cumbu.

Ing têgêsé aku, êmoh ganggu gawé, salawasé aku, mangan kijing kécé.
Awit kodhok aku, uwis gêrang dhaplok, ora ilok nyaplok, yèn mung kandhêg tênggok.
Tak dongèng tholé, rungokna sing titi, bokya réné linggih, rada cêdhak baé.
Aku iki têmên, isih turun pyayi, mung nglakoni tindak, bêcik lan kang suci.

Nganti tuwa tansah, watakku takgawa, aku gêla duwé, tumindak kang ala.
Kodhok domblong kétok, mripat kêlong-kêlong, ning durung plong pikir, gorèh mandhêg mayong.
Arêp nyêdhak samar, yèn kalêbu têlak, tan andhangak mripat , nyawang ambêlalak.
Kodhok lali marang, wataké si Bango, nanging telat kodhok, wis mlebu jro telak.

sapi nggiring kali serayu, 110920132122
Dening Rochani Sastro Adinegoro

Tinggalkan Balasan

%d blogger menyukai ini: